Əsas səhifə - Tournament

7 iyun 2024

Dövlət qurumlarının əməkdaşları arasında avarçəkmə yarışı keçirilib

İyunun 7-də dövlət qurumlarının əməkdaşları arasında avarçəkmə yarışı keçirilib. Gənclər və İdman Nazirliyi və Azərbaycan Kanoe və Avarçəkmə Federasiyasının təşkilatçılığı ilə keçirilən yarışda 9 dövlət qurumundan 29 əməkdaş (23 kişi, 6 qadın) iştirak edib.

Kişilərin fərdi yarışında SOCAR-ın əməkdaşı Ehtibar Əsədov finiş xəttinə birinci çatıb. Əmək və Əhalinin Sosial Müdafiəsi Nazirliyinin nümayəndəsi Əli Dadaşov yarışı ikinci, SOCAR-ın digər əməkdaşı Elşad Kərimov isə üçüncü pillədə başa vurublar.

Qadınlar arasında Gənclər və İdman Nazirliyinin (GİN) əməkdaşı İlahə Çələbiyeva birinci olub. Xəzər Dəniz Gəmiçiliyinin əməkdaşları Janna Məmmədova və Tatyana Srebnaya müvafiq olaraq ikinci və üçüncü yerə layiq görülüblər.

Qarışıq komanda yarışında SOCAR-ın əməkdaşları Ehtibar Əsədov və İlahə Hacıyeva cütlüyü ən yaxşı nəticə ilə birinci olub. Xəzər Dəniz Gəmiçiliyinin əməkdaşları Mikayıl Protasov və Janna Məmmədova dueti ikinci, Hüseyn Quliyev və Rəna Əliyeva (GİN) ikilisi isə üçüncü yeri tutublar.

Kişilərin komanda yarışında Gənclər və İdman Nazirliyinin əməkdaşları Hüseyn Quliyev və Salman Quliyev (GİN) qalib olublar. Əmək və Əhalinin Sosial Müdafiəsi Nazirliyinin nümayəndələri Əli Dadaşov və Əliağa İbadullayev dueti ikinci, SOCAR-ın təmsilçiləri Ehtibar Əsədov və Elşad Kərimov cütlüyü isə üçüncü olublar.